KORUPSYON: Pataas o Pababa?

Sa isang survey na isinagawa ng Social Weather Stations (SWS) mula July 16 hanggang September 14 ngayong taon, 71 porsyento (826 business executives) ang nagsabing mas bumaba ang korupsyon sa gobyerno kumpara sa mga nagdaang taon. Tumaas ang "sincerity rating" ng 16 na ahensiya ng pamahalaan sa pangunguna ng Office of the President na  may excellent mark (+81 mula  -37). Dumausdos naman ang sincerity rating ng mga city goverments (+35 to +24), Supreme Court (+40  to +23) at COMELEC (-8 to -14). Wala nang government agency ang binigyan ng "Very Bad" rating.  Katulad ng inaasahan, ang may "Bad" Rating pa rin ang Department of Customs  (-69 to -45).

Ang inilabas ng SWS ay ang pananaw ng mga businessmen pagdating sa katiwalian sa pamahalaan. Hindi ito ang kumpletong larawan. Kailangan din tingnan ang pulso ng sambayanan at silipin ang tunay na nagaganap sa lipunan. Pag-aralan din ang korupsyon na ginagawa ng maraming negosyante tulad ng hindi pagi-isyu ng resibo, pandaraya sa kanilang accounting books at hindi pagbabayad ng tamang buwis.

Paano ba natin tinitingnan ang korupsyon? Maraming Filipino ang nakatuon sa mga high profile cases (wholesale corruption) subalit nagbu-bulag-bulagan sa mga pang-araw-araw na manipestasyon nito (petty or street-level corruption). Galit na galit ang marami sa mga Kongresistang nagnanakaw ng kanilang pork barrel subalit OK lang ang panunuhol sa traffic enforcer. Kinukundena nila ang mga illegal na transaksyon sa mga ahensya ng gobyerno subalit nagpapadulas naman upang mapabilis ang takbo ng kanilang mga dokumento.

Nakakataba ng puso ang resulta ng survey dahil sa paglakas ng kumpiyansa ng  mga miyembro ng business sector sa gobyerno.  Subalit napakababa pa rin ng bilang ng mga nagre-report ng mga suhulan at katiwalian (9 percent) dahil sa pag-aakalang walang pupuntahan ang kanilang hinaing. Ito ang dahilan kung bakit dapat nang ipasa ang Freedom of Information (FOI) Bill upang mas lalong mapadali ang pagre-report ng mga corruption activities at mas mabigyan ng proteksyon ang mga mamamayan na mag-uulat ng katiwalian. Kung talagang "sincere" ang pamahalaang Aquino na sugpuin ang korupsyon, kailangang mas paigtingin ang mga institusyon, patatagin ang kultura ng pagbabantay, at magpasa ng mga batas na susupil sa mga maling gawain sa gobyerno.

Ipinagkikibit-balikat ng marami ang mga katiwalian dahil sa paniniwalang wala nang solusyon ang problema. Huwag tayong maniwala sa kasinungalingang ito. Ang kasalanan ang naghihiwalay sa atin sa Diyos (Roma 3:23). Kailangang manguna ang mga taga-sunod ni Cristo sa pagsasabuhay ng kabanalan ng Diyos. Higit sa lahat, simulan ang pagwaksi ng korupsyon sa loob ng iglesya. Walang karapatang magsabi ang mga taong simbahan na sugpuin ang korupsyon sa gobyerno kung sila mismo ay hindi mapagkakatiwalaan sa salapi ng iglesya. Ialay natin ang ating mga sarili bilang mga handog na buhay at nakakalugod sa Diyos (Romans 12:1-2).

Ang hamon ngayon ay kung paano ipagpapatuloy ang ganitong kalakaran. Tatlong taon na lamang sa puwesto ang presidente. Kung maluluklok ang isang lider na taliwas ang pagpapahalaga sa kanya, maaring mapunta sa wala ang lahat ng pinaghirapan ng kaniyang pamunuan. Dito pumapasok ang papel ng simbahan na aktibong makisangkot upang masugpo ang katiwalian sa iba't ibang bahagi ng buhay-Pinoy. Kailangang magbantay at patuloy na manalangin para sa kagalingan ng bayan.


Ito po si Ronald Molmisa para sa Opinyon ng Pilipino. Dahil sa isang bansang may demokrasya, opinyon ng bawat isa ay mahalaga.